佐敦谷公園唔喺佐敦？

早幾日就同史友們講到觀塘區內有個叫做「四順」嘅地區，而喺「四順」呢個區域附近，就有一個咁多年嚟呃咗唔少人嘅公園，呢個公園叫做佐敦谷公園。

作為觀塘區內面積最大嘅公園，呢個公園前身其實係佐敦谷堆填區，面積有成6.3公頃，當年一共用咗1.8億港元興建，2010年先至正式啟用。

點解阿史會冇啦啦話呢個公園呃人呢？事關係每次聽到佐敦谷公園，都會下意識以為呢個公園就喺佐敦，但點知原來係喺觀塘區，真係估佢唔到。而翻查下資料，就會發現原來佐敦谷喺區內一處山谷地帶嘅叫法，早年山谷嘅北面仲係茶寮坳順利公共房屋區，南面仲係牛頭角住宅區，而叫做佐敦谷，相信係同以往協助香港撲滅鼠疫嘅病理學家佐敦醫生有關，所以就有咁樣嘅誤會喇！